«Արսենալի» գործադիր տնօրեն Իվան Գազիդիսը վստահ է, որ գլխավոր մարզիչ Արսեն Վենգերը նոր պայմանագիր կստորագրի «Արսենալի» հետ և դեռ երկար տարիներ կմարզի «զինագործներին»:

Վենգերը լոնդոնյան ակումբը գլխավորում է արդեն 17 տարի, սակայն վերջին ութ տարում չի հաջողվում ոչ մի տիտղոս նվաճել: Ֆրանսիացու ներկայիս պայմանագիրը կլրանա 2014թ-ի ամռանը: Խոսվում է, որ Վենգերը կարող է հեռանալ «Արսենալից» և նրա ծառայություններով լրջորեն հետաքրքրված է ֆրանսիական «ՊՍԺ»-ն:

Սակայն «Արսենալը» չի պատրաստվում կորցնել այդպիսի բարձրակարգ մասնագետին: Գազիդիսը վստահ է, որ 63-ամյա Վենգերը ցանկանում է շարունակել իր աշխատանքը «Արսենալում»:

«Մենք վստահ ենք, որ ֆանտաստիկ մարզիչ ունենք: Հուսով ենք, որ նա ուզում է անել այն, ինչ որ հիմա է անում: Նա դեռ բավական ամբիցիոզ է և ցանկանում է առաջ գնալ: Վենգերը տեսնում է ապագան, և կարծում եմ՝ ոգևորվում է»:

«Մենք հիանալի հարաբերություններ ունենք: Դրա համար հանգիստ և ճիշտ պահին մենք նոր պայմանագրի ստորագրման մասին հայտարարություն կանենք: Դա ներքին որոշում է, որը կընդունվի փակ դռների հետևում, որից հետո կլինի հայտարարությունը»:

«Ես չեմ էլ ուզում խոսել դրա մասին (քննարկել նոր պայմանագիր): Մենք վստահ ենք, որ Արսենը  ճիշտ մարդ է, ու նա է շարժվում ակումբի հետ, եւ ես կարծում եմ, որ նա ևս ցանկանում է պայմանագիր կնքել ակումբի հետ», - Գազիդիսի խոսքերը  մեջբերում է Sky Sports-ը: