«Արսենալի» գլխավոր մարզիչ Արսեն Վենգերը հայտնել է, որ Լուիս Սուարեսին, Ուեյն Ռունիին և Գոնսալո Իգուաինին գնելու նպատակները միանգամայն իրական են թիմի համար:

Դեռ մեկ ամիս առաջ, «Արսենալի» երկրպագուները հավատում էին, որ «Էմիրեյթսը» կհամալրվի համաշխարհային մակարդակի աստղերով, ինչպիսին են` Ուեյն Ռունին, Մարունա Ֆելայնին և Էդինսոն Կավանին:

Տրանսֆերային պատուհանը բացվելուն պես, «Արսենալը» ձեռք է բերել միայն 20-ամյա Յայա Սանոգոյին, որին թիմը գնել է ազատ ֆուտբոլիստի կարգավիճակով: Վենգերն անգամ չցանկացավ 1 մլն ֆունտ ծախսել Բրազիլիայի ազգային հավաքականի դարպասապահ Ժուլիո Սեզարին ձեռք բերելու համար,որի տեղափոխությունը «Արսենալ» հիանալի կլիներ:

Այնուամենայնիվ,Արսեն Վենգերը չի կորցնում իր լավատեսությունը: Վենգերը վստահ է, որ այս ամռանը ֆինանսական խնդիրներն «Արսենալի» համար առաջնային չեն և բարձրակարգ ֆուտբոլիստներ գնելու հնարավորություն դեռ կա:

«Սուարեսը, Ռունին և Իգուաինը միանգամայն իրական նպատակներ են: Նրանք բարձրակարգ ֆուտբոլիստներ են, բայց մեզ համար ոչ բոլոր ֆուտբոլիստներն են հասանելի: Նախ նրանք պայմանագրեր ունեն իրենց ակումբների հետ և իրենց ապագան կախված է այդ ակումբներից: Ակումբներն են որոշում նրանց բաց թողնել, թե ոչ, և եթե բաց թողնեն, ապա որ ակումբ:Ակումբներն են նաև սահմանում նրանց տրանսֆերային գինը:

Այս տարի մենք բավական մեծ ֆինանսական միջոցներ ունենք: Մենք ինքներս ենք ստեղծել այդ միջոցները,մեր ուժերով: Այս պահին մենք ակտիվ աշխատանքներ ենք տանում տրանսֆերային շուկայում, որպեսզի իրականացնենք տրանսֆերային մեր գլխավոր նպատակները:

Երկրպագուները, ֆուտբոլիստները և ընդհանրապես բոլորը շատերին են ցանկանում որպեսզի մենք գնենք, սակայն մեզ պետք է ոչ թե քանակ, այլ որակ: Նախորդ տարիներին մենք չէինք կարողանում մեծ տրանսֆերներ իրականացնել, սակայն այս անգամ ֆինանսական խնդիրներ չունենք:

Մենք ցանկանում ենք նոր ֆուտբոլիստներ հրավիրել և թիմն ավելի ուժեղ դարձնել: Սպասում եմ, որ հենց այդպես էլ կլինի: Մենք ակտիվորեն աշխատում ենք այդ ուղղությամբ և ամեն ինչ ցանկանում ենք իրականացնել», Վենգերի խոսքերն է մեջբերում Daily Mirror-ը: